TÍA MANUELA

Envellecemento saudable

Luís Celeiro

13/07/2016

Na ciencia cómpre ter confianza. Moitos compartimos a idea de que aí, na ciencia está a esperanza, por iso todo o gasto que se faga neste eido debe ter a consideración de investimento para o futuro, para o benestar social, para a solidariedade entre homes, mulleres e pobos, entre tódolos pobos do mundo.  Temos avances importantes e unha consideración moi positiva dos mesmos, pero a sociedade actual debe ser esixente con aquelas persoas que fan o reparto dos orzamentos para que se poida seguir avanzando e dando pasos na procura de sabelo todo, de onde vimos, a onde imos e como é o mundo no que vivimos.
 
A ciencia ten que axudar tamén a erradicar as enormes desigualdades. Nela podemos e debemos ter fe. E, miren vostedes!, atopa explicación tamén ao fenómeno do envellecemento dos humanos, que tanto preocupa a moitos. Segundo un estudio recentemente publicado na revista Nature, a forma de envellecer pode estar determinada moito antes do seu comezo, dado que a mutua influencia dos xenomas nuclear e mitocondrial consegue unha adaptación celular con incidencia na calidade do envellecemento. Ao cambiar o xenoma da mitocondria, prodúcense cambios no ritmo do envellecemento.

Este estudo está capitaneado polo Centro Nacional de Investigaciones Cardiovasculares Carlos III (CNIC) e nel participa, como primeira asinante, a investigadora da Universidade de Santiago de Compostela, Ana Latorre Pellicer, unha das integrantes do grupo de investigación que lidera o profesor Carracedo. Entre as autoras do mesmo figuran tamén Raquel Cruz e Beatriz Sobrino.

O envellecemento é un proceso imparable, pero a ciencia, despois de experimentar cos ratos, fará  que se desenvolva de forma saudable. Se os científicos seguen nesta liña, e teñen os apoios necesarios, conseguirano e, desa forma, teremos un mundo moito máis rico. Ben que o dicía a Tía Manuela, “a riqueza é ter saúde”. E, volvemos ao de sempre, os países máis pobres teñen enfermidades mortais ás que non poden atacar. Sen embargo, hai quen asegura que a riqueza non é suficiente para ter boa saúde.  É obvia a necesidade da  interacción da ciencia, da economía, da política, dos sistemas sanitarios e sociais para acadar goce na vida e no envellecemento.  

Artigo publicado en:

El Progreso (12/07/16)
Diarío de Pontevedra (12/07/16)
El Correo Gallego (13/07/2016)
La Región (13/07/2016)

Artigos publicados anteriormente:

50). Envellecemento saudable (13/07/16)
49). O amigo do home (05/07/16)

1º semestre de 2016.-
Ano 2015.-