A Exposición “De Amor e de Amigo, as cantigas de Martín de Padrozelos” estará en Samos ata o día 21 de xullo

03/07/2021

A Exposición “De Amor e de Amigo, as cantigas de Martín de Padrozelos”, inaugurase o venres, día 2 de xullo de 2021, no Concello de Samos. No acto participaron o alcalde, Julio Gallego; o presidente da Asociación de Periodistas e Estudosos do Camiño de Santiago (APECSA), Xosé María García Palmeiro; a responsable territorial de Turismo de Lugo, Paloma Vázquez; o comisario da Exposición, o xornalista Luís Celeiro Álvarez, e un nutrido grupo de veciños do concello, maioritariamente de Lóuzara, de onde, segundo os investigadores, era natural o Trobador medieval.

Esta Exposición, coas dez cantigas de Martín de Padrozelos, chegou a Samos, procedente de Triacastela, e permanecerá aberta ao público ata o 21 de este mes. Despois, seguirá a súa itinerancia polos concellos do Incio (22 de xullo –5 de agosto 2021),  Folgoso do Courel (6 de agosto – 17 de agosto 2021), Portomarín (19 de agosto – 30 de agosto 2021), ata rematar en Pedrafita do Cebreiro (1 de setembro – 11 de setembro 2021). Inicio o seu recorrido na Antiga Prisión Preventiva de Sarria, o día sete de maio pasado, despois foi a Láncara, Paradela e Triacastela.

Trátase dunha mostra que transmite e fai visible a importancia da lírica galega na Idade Media. É de carácter divulgativo, axudando a coñecer a Martín de Padrózelos, que no dicir do profesor, Xulio Pardo de Neyra, é o primeiro escritor coñecido da literatura galega, “un poeta cuxo nome sería Martin Pérez de Padrozelos, con vinculacións co mosteiro de Samos e as terras do Incio, fundamentalmente de  San Salvador e o Val do Mao.

O grupo A Quenlla musicou as dez cantiagas deste trobador e, segundo anunciou o alcalde de Samos, Julio Gallego, acturá nesta localidade o día oito de agosto, nun concerto especial con estas dez cantigas. O concerto será presentado polos promotores do proxecto “Martín de Padrozelos, andares pola lírica galega”, promovido pola Asociación de Periodistas e Estudosos do Camiño de Santiago (APECSA), impulsado e coordenado polo xornalisla Luís Celeiro.

Documental, “Trobador no Camiño, andares pola lírica de Martín de Padrozelos”:
https://www.youtube.com/watch?v=nm3bwdWrQ4Q