A Asociación de Periodistas e Estudosos do Camiño de
Santiago (APECSA) convoca o X Premio Internacional de Divulgación do Camiño de
Santiago, que distinguirá ao mellor traballo ou acción de difusión e promoción
da ruta e os valores xacobeos no ano anterior ao desta convocatoria (2021) e no
primeiro semestre deste ano 2022.
A Xunta Directiva de APECSA dedica esta Edición, in
memoriam, a Pilar Armesto Valiña (Sarria 1955 - O Cebreiro 2021), hospitaleira,
mesoneira, dinamizadora e defensora dos valores do Camiño de Santiago, pioneira
no asociacionismo e na acollida aos peregrinos.
Poderán presentarse obras e iniciativas de
divulgación, promoción e protección do Camiño de Santiago e dos seus valores en
libros, publicacións, traducións, producións audiovisuais, series en calquera soporte,
congresos, xornadas, encontros e/ou accións realizadas por institucións e
persoas físicas ou xurídicas, en defensa e beneficio do Camiño de Santiago.
As propostas deberán enviarse ata o día 5 setembro
de 2022, ao correo-e: xornalistas.caminodesantiago@gmail.com ou dirixirse a: APECSA, Rúa Castrón Douro, 20, (15703-Santiago de
Compostela).
O Premio, igual que nas edicións anteriores, non ten
dotación económica e o ganador recibirá unha escultura, Harmonía, do
lucense Luís Loureira e un diploma acreditativo.
Na edición de 2021, o Premio foi para a Asociación
de Escritoras e Escritores en Lingua Galega (AELG). No ano 2020 o ganador do
Premio foi o grupo musical A Quenlla, sendo ganadoras en 2019 as Universidades
de Santiago de Compostela e de Cagliari (Italia). O Parlamento de Galicia foi
premiado en 2018 e nas dúas edicións anteriores, 2017 e 2016, os premiados
foron, respectivamente, Segundo Pérez, daquela, deán da Catedral de Santiago, e a
revista Peregrino, editada pola Federación Española de Asociacións de Amigos do
Camiño. Javier Gómez-Montero, catedrático de Literaturas Románicas da
Universidade alemá de Kiel, foi premiado na edición de 2015, despois do
recoñecemento á Editorial Bolanda pola edición de “La Gran Enciclopedia del
Camino de Santiago”.
A Asociación convocante, APECSA, constituída en
1992, é unha das máis veteranas no seu ámbito e a ela pertencen xornalistas,
escritores, historiadores e estudosos do Camiño de Santiago.
Bases
1. Poderán presentarse a esta edición do Premio Internacional APECSA de
Divulgación do Camiño de Santiago, obras e iniciativas de divulgación e
promoción xacobea -libros, publicacións, producións audiovisuais, series en
calquera soporte, congresos, xornadas, encontros, etc.- editadas ou executadas
no ano 2021 e no primeiro semestre deste ano 2022, aínda que poidan ter unha
continuidade no tempo. En todo caso, non se premiarán traxectorias, senón o
traballo realizado por persoas físicas ou xurídicas de calquera parte do mundo,
por institucións ou entidades que teñan entre os seus obxectivos a defensa,
conservación e divulgación da cultura e patrimonio xacobeo.
2. As iniciativas a concurso deberían estar orientadas, preferentemente,
a todo tipo de públicos e presentar unha faceta orixinal e renovadora en
materia de difusión do Camiño e do mundo xacobeo, en calquera das súas
realidades -relixiosa, cultural, turística, etc.-Valorarase o alcance,
xustificado, da súa difusión e a súa importancia no desenvolvemento local. As
obras e iniciativas poderán proceder de calquera país e presentarse en calquera
idioma occidental. Serán presentadas polos seus promotores ou autores. Os
membros do xurado, antes de comezar as deliberacións, poderán presentar
candidaturas.
3. O xurado estará formado por cinco membros, persoas de recoñecida
traxectoria. Dous membros corresponderán a APECSA, designados pola súa Xunta
Directiva, e os tres restantes, a invitación de APECSA, representarán ás
asociacións ou colexios de xornalistas, ao mundo da hostalería e o comercio
vinculados ao Camiño, e ás entidades xacobeas (asociacións, institucións,
etc.).
4. O xurado poderá declarar o Premio deserto, compartilo entre máis dunha
proposta e conceder, se así o estima, ata un máximo de dous accésits. A
decisión do xurado será inapelable.
5. Non poderán presentarse ao Premio as iniciativas promovidas pola
Asociación convocante, APECSA.
6. O prazo de presentación e recepción de obras e iniciativas a concurso
finaliza o día cinco de setembro de 2022. O acto de entrega do Premio
realizarase antes do 28 de novembro de 2022.
7. As candidaturas presentaranse a través do correo electrónico, xornalistas.caminodesantiago@gmail.com, ou dirixíndose á seguinte dirección postal:
Rúa Castrón Douro, número 20. 15703 Santiago de Compostela. Farase constar en
lugar destacado o título do premio e a edición correspondente.
8. O Premio consistirá nunha escultura, Harmonía,
de Luís Loureira e un diploma acreditativo.
9. As propostas non premiadas poderán ser recollidas polos seus
responsables ou quen debidamente lles represe, na mesma dirección de entrega,
antes dos tres meses posteriores ao fallo do Premio.
Santiago de Compostela, 29 de xuño de 2022
Asociación de Periodistas e Estudosos do Camiño de Santiago xornalistas.caminodesantiago@gmail.com
|
